gulf

പ്രവാസി മലയാളിയെ കൊലപ്പെടുത്തിയ കേസിലെ പ്രതിക്ക് വധശിക്ഷ.

Tiju Kannampally  ,  2019-07-13 01:17:09amm
മനാമ: പ്രവാസി മലയാളിയെ താമസ സ്ഥലത്തുവെച്ച് കൊലപ്പെടുത്തിയ കേസിലെ പ്രതിക്ക് ബഹ്റൈൻ കോടതി വധശിക്ഷയ്ക്ക് വിധിച്ചു. 41 കാരനായ സുഡാനി പൗരനാണ് വധശിക്ഷ. കഴിഞ്ഞ വർഷം ജുലൈ മൂന്നിനാണ് കോഴിക്കോട് താമരശേരി സ്വദേശി അബ്ദുൾ നഹാസിനെ പ്രതി കൊലപ്പെടുത്തിയത്.
കൈകൾ കെട്ടിയ നിലയിലും തലയ്ക്ക് പരിക്കേറ്റ നിലയിലുമായിരുന്നു മൃതദേഹം. നഹാസിനെ ഇലക്ട്രിക്ക് വയറുകൊണ്ട് കഴുത്തുമുറുക്കി കൊല്ലുകയായിരുന്നുവെന്ന് വിചാരണ വേളയിൽ പ്രതി സമ്മതിച്ചു. തെളിവ് നശിപ്പിക്കാൻ മൃതദേഹത്തിൽ മുളകുപൊടി വിതറുകയും എണ്ണ ഒഴിക്കുകയും ചെയ്തിരുന്നു. കേസ് വഴി തിരിച്ചുവിടാൻ ചുവരിൽ മുദ്രാവാക്യം എഴുതി വെയ്ക്കുകയും ചെയ്തു. 
നഹാസിനെ ഫോണിൽ ബന്ധപ്പെടാൻ ശ്രമിച്ചിട്ടും കിട്ടാതെ വന്നതോടെ സുഹൃത്തുക്കൾ റൂമിൽ അന്വേഷിച്ച് ചെയ്യപ്പോഴാണ് രാത്രി ഒൻപത് മണിയോടെ മൃതദേഹം കണ്ടെത്തിയത്. 

കൊലയാളിയും നഹാസും തമ്മിൽ അടിപിടിയുണ്ടായെന്ന് വരുത്തിത്തീർക്കാൻ മുറിയിലെ സാധനങ്ങൾ പ്രതി വലിച്ചുവാരിയിട്ടു. പ്രതിക്കെതിരെ വ്യക്തമായ തെളിവ് ലഭിച്ചതിനാൽ പരമാവധി ശിക്ഷ നൽകുകയാണെന്ന് കോടതി വ്യക്തമാക്കി. വധശിക്ഷയ്ക്ക് പുറമേ മോഷണക്കുറ്റത്തിന് മൂന്ന് വർഷത്തെ ജയിൽ ശിക്ഷയും വിധിച്ചിട്ടുണ്ട്. ഇതിനു ശേഷമായിരിക്കും വധശിക്ഷ നടപ്പാക്കുക.




Latest

Copyrights@2016.